پیشہ ور فوٹوگرافروں کی آنکھ سے مسجد الحرام کے جاذبِ نظر خوب صورت مناظر

 مکہ مکرمہ میں مسجد الحرام میں عبادت گزاروں کی تصاویر عام لوگ تو بناتے ہی رہتے ہیں اور ان میں بعض فن کا شاہکار ہوتی ہیں لیکن اگر یہی تصویر کشی کوئی پیشہ ور فوٹو گرافر کیمرے کی آنکھ سے کرے تو مسجد الحرام کے حسن اور دل کشی کو اور بھی چار چاند لگا دیتی ہے۔ العربیہ ڈاٹ نیٹ نے ایسے ہی دو فوٹو گرافروں سے بات کی ہے ۔ انھیں مسجد الحرام میں عبادت میں مصروف ، کعبۃ اللہ کا طواف کرتے ہوئے اور حجر ِاسود کو بوسہ دیتے ہوئے فرزندان توحید کی تصاویر بنانے کا تجربہ ہے۔ فوٹو گرافر احمد الحضر نے بتایا کہ انھیں فضائی تصویر کشی میں دل چسپی ہے اور ان کی فضا سے لی گئی تصاویر ان کی اس دل چسپی کی عکاس ہیں۔ یہ اپنی ایک خصوصی انفرادیت کی حامل ہیں۔

 انھوں نے خاص طور پر مسجد الحرا م کی بالائی چھت سے عبادت گزاروں کی نماز ادا کرتے ہوئے تصاویر لی ہیں اور تصویر کشی کے اس عمل کو تخلیقی بنانے کی کوشش کی ہے۔ ایک اور فوٹوگرافر عبداللہ الطریقی کا کہنا تھا کہ مسجد الحرام کی خوب صورتی کے ساتھ عبادت میں مصروف افراد کی تصویر کشی کسی بھی ایسے فوٹو گرافر کے لیے کسی چیلنج سے کم نہیں ہوتی جو ایسے مناظر کو منفرد اور پیشہ ور انداز میں کیمرے کی آنکھ میں محفوظ کرنا چاہتا ہے۔

انھوں نے مسجد الحرام کے اندرونی مناظر ، طوافِ کعبہ کے عمل میں مصروف زائرین ، الحجر الاسود اور حجر اسماعیل کی تصاویر لی ہیں۔

بشکریہ العربیہ اردو