عازمین حج کے لئے مفید ہدایات، انہیں ہر صورت یاد رکھیں

سعودی عرب کے محکمہ شہری دفاع نے حج کے موقع پر اختیار کی جانے والی ہدایات اور احتیاطی تدابیر جاری کردی ہیں۔ اگر آپ عازمین حج ہیں تو نا صرف مندرجہ ذیل ہدایات اور احتیاطی تدابیر کو اچھی طرح ذہن نشیں کرلیں بلکہ دوسروں کو بھی اس سے آگاہ کریں۔ تمام ہدایات اور تدابیر خود عازمین حج کی حفاظت اور سلامتی کے لئے جاری کی گئی ہیں۔ مکہ مکرمہ میں محکمہ شہری دفاع نے تمام عازمین سے اپیل کی ہے کہ وہ سرنگوں میں بیٹھنے یا ڈیرہ ڈالنے سے اجتناب کریں کیوں کہ ان میں مضر صحت گیس ہو سکتی ہے۔

معمر عازمین کے علاوہ خواتین اور بچوں کو مناسک کی ادائیگی کیلئے آسانیاں پیدا کریں ،حج دراصل ایثار و قربانی کا دوسرا نام ہے۔ عازمین کو چاہئے کہ وہ اپنے مسلمان بھائیوں کے لئے وہی کچھ پسند کریں جو وہ خود اپنے لئے پسند کرتے ہیں۔ محکمہ شہری دفاع کے اہلکاروں نے کہا کہ مکہ مکرمہ اور مشاعر مقدسہ میں موجود اہلکار اور سیکورٹی فورس عازمین کی خدمت اور انہیں سہولت فراہم کرنے کیلئے متعین کئے گئے ہیں۔ ان کی ہدایات پر عمل کرنا ضروری ہے۔ یہ اہلکار عازمین کی سلامتی کے حریص ہیں۔

محکمہ شہری دفاع نے عازمین کو ہدایات دیتے ہوئے کہا کہ عازمین طواف اور دیگر مناسک کی ادائیگی کے دوران دھکم پیل سے اجتناب کریں اور شعائر کی ادائیگی میں جلد بازی نہ کریں۔ جو سرنگیں گاڑیوں کیلئے مختص ہیں ان میں پیدل سفر کرنے کی کوشش نہ کریں بلکہ ان سرنگوں کا رخ کریں جو پیدل سفر کرنے والوں کیلئے مختص ہیں۔ اپنی آرگنائزیشن اورمعلم کے نام کے علاوہ مکتب نمبر کو ہمیشہ یاد رکھیں۔ جس ہوٹل میں آپ کا قیام ہے اس کا نام ، فون نمبر اور پتہ نوٹ کر لیں۔ منیٰ میں اپنے خیمےکا نمبر یاد رکھیں اور خیمے کے قریب واضح علامتوں کو ذہن میں محفوظ کر لیں۔

منیٰ میں شاہراہوں اور سڑکوں پر بیٹھنے سے اجتناب کریں ۔ سڑکوں پر بیٹھنے سے حادثات رونما ہو سکتے ہیں۔ دھوپ اور بارش سے محفوظ کرنے والی چھتری کا استعمال ضروری ہے، اسے ہمیشہ اپنے ساتھ رکھیں۔ مکہ مکرمہ ، منیٰ اور مشاعر مقدسہ میں حکومت نے آپ کی سہولت اور آسانی کیلئے تمام اسباب فراہم کر رکھے ہیں اس لئے ان حکومتی املاک کی حفاظت کیجئے۔ بسوں میں سوار ہوتے اور اترتے وقت اپنی سلامتی کا خاص خیال رکھیں۔ ہنگامی حالات کے وقت    امدادی گاڑیوں کیلئے راستہ کھلا رکھیں۔

مکہ مکرمہ، منیٰ اور مشاعر مقدسہ میں جہاں بھی آپ کا قیام ہو وہاں فائر فائٹنگ سسٹم کی موجودگی ضروری ہے۔ آگ بجھانے کے آلات رکھنے کی جگہ معلوم کر لیں۔ اس بات کا بھی علم حاصل کر لیں کہ ہنگامی حالات میں نکلنے کا راستہ کون سا ہے۔ ہنگامی حالت کی صورت میں سکون اور اطمینان کو برقرار رکھتے ہوئے معمر افراد، خواتین اور بچوں کو پہلے نکلنے کا موقع دیں۔ خیموں میں آگ جلانے سے مکمل طور پر اجتناب کریں۔ یاد رکھیں کہ حج منصوبہ آپ کے تعاون کے بغیر کامیاب نہیں ہوسکتا لہذا اسے کامیاب بنانے میں انتظامیہ کے ساتھ تعاون کریں۔
یاد رکھیں کہ مکہ مکرمہ اور مشاعر مقدسہ میں سگریٹ نوشی منع ہے، اس سے اجتناب برتیں۔

شاہد نعیم